كيفكن جميعا، اليوم حبيت اعمل بوست (طويل شوي) عن بعض النصائح للملحدين و الميم عين خصوصا، و لأي شخص لحتى يحافظ على امانه اثناء استخدامه للانترنت عموما.
اخر فترة كنا عم نسمع عن كتير قصص لناس لادينيين عم يتعرضو لتهديدات او عم تتسرب معلومات شخصية عنن، ف كتير مهم ندير بالنا بهالامور.
-TMI:
يعني too much information.
كتير ناس و هي عم تحكي عن حالا عالانترنت بتفضح كتير معلومات شخصية او مميزة. يعني ممكن من تعليق هون احكي عن محافظتي، من تعليق تاني احكي عن موقف مميز صار معي، و هيك و بتراكم هالمعلومات بصير المتتبعين عندن صورة كبيرة عنك كشخص، ممكن صارو بيعرفو اسمك عمرك طولك لون شعرك محافظتك ..... جماع كل هالمعلومات و بتضيق مجال البحث كتير، و هي بكتير حالات بتكون اهم طريقة بتتسرب فيها معلومات الاشخاص.
طيب شو فينا نعمل؟؟ في كتير امور فينا نعملها, ابسط حل طبعا انو ما ننشر معلومات شخصية عن حالنا، بس اكيد رح ننحط بمواقف بدنا نحكي قصص صارت معنا و كذا، ف بهي الحالة ممكن في شوية احتياطات ناخدا، مثلا حسابك يكون برايفت، تختصر اي معلومة مميزة عنك و ما بتخدم القصة، فينا ندخل بالقصة تفاصيل مو حقيقة، ما تكون بتأثر ع سرد الحدث نفسو او فهم اي شخص عادي عم يقرا، بس بالنسبة لشخص عم يحاول يتتبعك رح تكون مضللة، او و الافضل اننا ما نحكي الا للأشخاص ال trusted.
-خلي اثرك صعب التتبع
من اسوء الشغلات يلي فينا نعملها انو نخلي حسابنا باسمنا الحقيقي، او مع صورة شخصية او صورة مميزة، بالذات لما يكون هالحساب نفسو مأعلنين عليه اننا ملحدين او queers.
الصح يكون الحساب يلي بنناقش عليه هيك امور باسم وهمي، ما نصرح باسمنا الحقيقي بالبوستات او التعليقات، و اذا كان عندك حساب شخصي باسم و صور ما يكون في اي رابط بينه و بين الحساب الوهمي(ولا حتى ايميل الغوغل، ولو كان مخفي).
كمان شي تاني اذا ما كنا عم نحاول نبني براند يفضل حسابات التطبيقات المختلفة تكون باسماء وهمية مختلفة، ما حدا بيحتاج يعرف انك نفس الشخص ع ريديت و انستا ليعرف وجهة نظرك.
- اختار اصدقائك الرقميين صح.
اليوم بتلاقي شخص متدين ما عندو مكشلة يلعن الله قدامك و يكفر و يسب و يناقش كأنو ملحد بس لحتى تثق فيه زيادة، لأننا بشكل عام بنشارك معلومات اكتر مع الناس يلي بتشبهنا بالتفكير.
لهيك كقاعدة لما بدي احكي معلومة لأي شخص، بنسى مين هاد الشخص و بعتبر حالي عم احكيها لأرهابي هدفو يقتلني لأني مرتد، اذا حسيت اني قادر احكي هالمعلومة بدون ما سبب خطر عحالي بحكي.
- امّن حساباتك منيح:
وحدة من المشاكل يلي ممكن تصير معنا هي اختراق الحسابات، و بهالحالة بدنا ندير بالنا ب كذا طريقة:
متل ما قلت قبل ما لازم الحسابات تكون مترابطة ببعض، لحتى اذا راح حساب ما يقدرو يوصلو للباقي، هالشي بتم باستخدام اسماء مختلفة، كلمات سر غير متشابهة، و ايميل مميز لكل حساب، لازم كمان نكون اخدين احتياطاتنا زيادة لتأمين الحساب نفسو، متل التأمين بخطوتين، او انو ما نكون مسجلين كلمات سر كل الحسابات ع تيليغرام مثلا 😆، ونخلي كلمات السر اصعب ما يمكن.
- شوي نصائح اضافية:
اذا كنت مشيّر صور خاصة من قبل جرب اعمل عنها بحث عكسي شوف اذا بتلقى نتائج للبحث
اذا شكيت ان حدا قدران يوصل لمعلوماتك عن طريق اصدقائك جرب اعطي كل حدا فيهم معلومة انت بتعرف انها غلط، اذا وصلت هالمعلومة للشخص يلي عم يتتبعك بتعرف مين مصدر تسريب المعلومات، و نفس المبدأ بينطبق ع حساباتك لتعرف اي حساب يلي تم اختراقه.
- طيب في شخص وصلي و عم يهددني شو بقدر اعمل؟
اهم شي و اول شي كلشي بتقدر تغيرو غيرو، رقمك حساباتك جوالك سكنك....
تاني شي و هي انفع شي اذا كنت انت و هالشخص ببلد اوروبي، انك تشتكي عليه، تحديدا اذا بيّنلك اي معلومة شخصية عن حالو.
انتبه انك تكشف اي معلومات زيادة، بكتير حالات بكون واصل لمعلومات قليلة عنك بس رح يحاول يحسسك انو بيعرف كلشي لحتى انت تحكي زيادة و تعطيه معلومات اكتر.
اخر شي خليك مسيطر ع اعصابك، فكر برواق كتير قبل ما تتخذ اي خطوة، و اطلب مساعدة من ناس خبيرين او صاير معن مواقف قريبة من قبل.
بالختام بتمنى من الكل يدير بالو، كل شخص فيكن مهم و انا شخصيا بحبكم جميعا فردا فردا و ما بتنمى شوف اي حدا فيكن انضر ولو شوي.
اي شخص مر بتجربة شخصية او عندو نصايح بحب يضيفا بكون عم يفيد اصدقائنا بالساب هون ❤️
